អ៉ីតាលី៖ ប៉ូលិសអ៉ីតាលីបានឱ្យដឹងក្នុងសេចក្ដីថ្លែងការណ៍កាលពីថ្ងៃពុធថា អាជ្ញាធរបានកំណត់អត្តសញ្ញាណមនុស្សចំនួន ៤នាក់បន្ថែមទៀតដែលជាជនសង្ស័យក្នុងអំពើប្រមាថ និងរើសអើងទៅលើអ្នកចាំទីរបស់ក្រុម AC Milan កីឡាករ Mike Maignan អំឡុងការប្រកួតទល់នឹងក្រុម Udinese ដោយអ្នកទាំងបួននឹងត្រូវរងបំរាមមិនឱ្យចូលមកកាន់កីឡដ្ឋានទស្សនាការប្រកួតរយៈពេល ៥ឆ្នាំ។ គួររំឮកថា ការប្រកួតរវាង Udinese និង AC Milan កាលពីសប្តាហ៍៍មុនត្រូវបានផ្អាកការប្រកួតប្រហែលជា ១០នាទី ក្រោយពីអ្នកចាំទីខាងលើបានជូនដំណឹងដល់អាជ្ញាកណ្ដាលអំពីសម្រែក និងទង្វើរើសអើងពីសំណាក់អ្នកគាំទ្រក្រុមម្ចាស់ផ្ទះមកលើខ្លួន។ 

បើតាមរបាយការណ៍របស់ប៉ូលិសបានបញ្ជាក់ថា ក្នុងចំណោមបុគ្គលទាំងបួននាក់ដែលរងបំរាមនោះរួមមានបុរសម្នាក់មកពីមកពីទីក្រុង Udine ខណៈបីនាក់ទៀតគឺជាស្រ្តី និងបុរសពីរនាក់ធ្វើដំណើរមកពីតំបន់នៅក្បែរនោះ ដែលអាជ្ញាធរបានកំណត់អត្តសញ្ញាណរបស់ពួកគេផ្អែកលើវីដេអូបានមកពីកាមេរ៉ាសុវត្ថិភាពរបស់កីឡដ្ឋាន Bluenergy។ គួរឱ្យដឹងថា កម្រិតនៃការពិន័យសម្រាប់អំពើល្មើសលើកដំបូងនៅក្នុងកីឡដ្ឋានអាចប្រឈមនឹងការហាមឃាត់រហូតដល់ ៥ឆ្នាំ។ 

គួរបញ្ជាក់ថា ជនសង្ស័យម្នាក់ទៀតត្រូវបានកំណត់អត្តសញ្ញាណ និងបានទទួលការពិន័យរួចរាល់ហើយកាលពីដើមសប្តាហ៍មុន ខណៈក្លិប Udinese បាននិយាយថាក្លិបក៏កំពុងពិចារណាលើការដាក់បំរាមមិនឱ្យចូលកីឡដ្ឋានពេញមួយជីវិតទៅលើបុគ្គលទាំងនោះផងដែរ។ ចុងក្រោយបង្អស់ ក្លិប Udinese បានរងការពិន័យដោយតម្រូវឱ្យប្រកួតដោយគ្មានទស្សនិកជនចូលទស្សនាចំនួន ០១ប្រកួត ពោលគឺការប្រកួតទល់នឹង Monza នៅថ្ងៃទី៣ ខែកុម្ភៈខាងមុខនេះ៕